Davao City – Wala na makaabot nga buhi sa Southern Philippines Medical Center (SPMC) ang usa ka empleyado sa gobyerno human kini gideklara nga dead on arrival ni Dr. Robem Crusano.
Giila ang biktima nga mao si Clarito Fernandez, 53 anyos, empleyado sa gobyerno, minyo, ug nagpuyo sa Deca Homes Indangan ning siyudad.
Subay sa imbestigasyon sa Traffic Section sa Presinto 5, gikan sa gasolinahan sa Cabantian ang biktima ug pagliko niini paingon sa Indangan nga direksyon kalit misumpok sa motor sa biktima ang naghaguros nga sidecar nga gimanehoan sa usa ka Emmanuelito Daclan, 29 anyos, ug residente sa samang dapit pasado alas-7:00 sa gabii.
Gumikan sa kakusog sa impact sa pagkabangga maayo pagkatuwad sa duha ka mga motor nga dunay sidecar ug maayo pagkabunal sa lawas sa semento nga bahin si Fernandez.
Paspas nakaresponde ang Central 911 Medic Team sa lugar ug dayon gidala sa SPMC apan wala na makaabot nga buhi sa ospital gumikan sa mga bun-og nahiagoman sa biktima.
Ang suspek nga si Daclan gikan sa Cabantian nga mupaingon unta sa Buhangin area niadtong tungora nagtingkagol na karon sa Buhangin PNP samtang kasong Reckless Imprudence Resulting to Homicide ang gi-andam nga kaso batok sa maong driver.
RadyoMaN Joel Viray
