Davao City – Gi-anunsyo karon ni Government of the Philippines (GPH) chief negotiator Silvestre Bello III nga sa dili pa matapos ang bulan sa Hulyo, ipahigayun sa gobyerno ug sa kaatbang niining National Democratic Front of the Philippines (NDFP) ang usa ka informal talks.
Sa usa ka forum, gibatbat ni Bello nga ang pasiunang panagtagbo malagmit magtuki sa posibilidad nga mapanday ang usa ka interim unilateral ceasefire ingon man ang unang pagbatbat sa isyu sa socio-economic reforms nga usa sa makonsidera nga ‘ticklish substantive issue’ sa hisgotanang pangkalinaw.
Matud ni Bello, daku ang ilang paglaum nga adunay inisyal nga agreement kun kasabutan sa lebel nga inpormal antes pa man mo-aginod ang duruha ka mga negotiating panels didto sa formal round of talks karong sunod bulan sa Agosto.
Hinoon, gipunting sa negosyador ang importansya sa ‘goodwill’ kun maayong intensiyon ilabi na nga ninggula ang unang bahad sa rebeldeng pundok nga ilang ilusad ang ‘intensive and accelerated offensives’ batok sa mga pwersa sa administrasyon diin kini makonsidera nga kalapasan sa espiritu kun diwa sa framework kun istruktura sa unang mga kasabutan-pangkalinaw.
Una niini, kahinumdoman nga gisugyot sa liderato sa armadong kusog sa nasud ug giubanan sa pipila ka mga senador ang pagpahunong usa sa negosasyon hangtud nga undangon sa New People’s Army (NPA) ang mga pagpangatake ngadto sa mga awtoridad ug uban pang mga targets.
“As Secretary (Jesus) Dureza said, despite the humps and bumps, we shall stay the course. This is the best legacy that the Duterte administration can hope for: An enduring and lasting peace,” dugang ni Bello.
Kasamang June Duterte
