Grabe na pagmahal sa presyo sa isda ug iban na produkto sa dagat tagreklamo sa mga konsumante sa Surigao City Sunod-sunod na reklamo an tagpaabot nan maarang na mga konsumante sa Surigao City, ini resulta sa grabe na pagmahal sa presyo sa isda ug iban na produkto gikan sa dagat. Sumaya pa nan mga ini, noabot na sa tag-P400 hangtud P500 an kada kilo nan nokos sigarilyo na kon sa normal na presyo pinakamahal na an P200 kada kilo. An isda na bariles noabot sa P400 an kada kilo, an salindato P300 kada kilo, an tamarong P240 kada kilo, bulis P200 isab an kilo ug iban pa. Tag-angkon nan mga mamaligyaa, tinuod na grabe an pagmahal sa pagkakuman resulta sa wayay karadjaw mga nangisda human an nasinati na bagyong Vinta lakip isab na pag-kompra pa nila sa may Fish Landing, taas na daan an presyo. Lakip isab na padajon na mitumaw an bikil-bikil o sa pag-abot nan isda sa Fish landing jaoy mokompra tapos patungan nan presyo nan kapila ka pilo hangtud moabot sa Chianggehan. Sa ini na sitwasyon, namahayag an Market Supervisor Albert Lustiva na nakabati na sija sa amo na reklamo na kasagaran tagpaabot sa radyo ug social media. Matud pa, tagtakda na mohimo sila nan koordinasyon ngadto sa City Agriculture’s Office na amoy tagtahasan sa pag-monitor nan presyo sa isda ug iban pa na agri products para na mapanubag ug mapahamtangan nan sanctions an mga malapason na mga manindahay suyod sa merkado.
