Davao City – Dili lang dinhi sa Pilipinas mikanat ang grabe nga krimen karon apan bisan ang ubang kanasuran nag-atubang niini diin wala pa’y maayo nga istratihiya sa pagsanta sa crime phenomenon karon.
Sumala ni Chaplain Auxiliary Association International Mindanao coordinator Dr. Arman Erandonia nga ang paghitak sa krimen nagpahigmata kanato nga ang kalibutan karon grabe na kadautan.
Sa miaging administrasyon, natala ang taas nga crime index sa tibuok nasud diin nag-una sa mga kaso ang droga, pagpatay, tulis, lugos, lungkab ug uban pa nga heinous crimes.
Apan karon, natala ang dili matupngan nga pagkunhod sa krimen sa nasud sukad gisugdan ang giyera sa droga busa sakto si Presidente Rodrigo Duterte nga giprayoridad ang ugat sa kriminalidad.
Dakong factor sa paglambigit sa droga ug krimen sa pipila ang kapobrehon diin ang ilang kahimtang gipahimuslan sa sindikato sa droga ug sa organized crime group.
Busa bisan og risgo ang nasudlan mupadayon na lamang sila sanglit walay laing mahimo aron mabuhi lakip ang ilang pamilya.
Si Dr. Arman, nag-awhag sa gobyerno nga magtagana og livelihood program alang sa mga walay trabaho aron dili sila mapugos og pagsugal sa kalaotan nga matang sa panginabuhi.
Ang Balaang Kasulatan nagsulti nga mas magkadaotan pa ang kalibutan kansang ang wala’ag tuo nga krimen karon kabahin sa katumanan sa panagna diin ang mga tawo mas mupalayo pa sa Dios.
Masinati lamang ang matuod nga kausaban ug kaayohan sa yutang dunot kung tugotan sa mga tawo ang Dios nga mu-usab sa ilang kinabuhi gikan sa paghimo og sala sama sa droga ug pagpatay.
Mga Kasama, si Hesu Kristo lang ang bugtong tubag sa kadautan sa mga tawo karon ug kaniya adunay tinuod nga kausaban ug kaayohan gikan sa pagkamakasasala.
Timan-i, ang tanang dautan nga dili mangayo og pasaylo ug mudawat kang Kristo isip Manluluwas ug Dios sa kinabuhi, makatagamtam sa linaw nga kalayo didto sa impiyerno isip silot sa krimen nga nahimo.
RadyoMaN Joel Viray
