Grabeng head injuries gikamatay sa lady guard

699

Davao City – Nakaangkon og daghang binunalan sa ulo ang babayeng sekyu kinsa nakaplagang patay alas-7:00 sa buntag sulod sa compound sa Aydilnan Trading/Surplus Car Display Center sa may Greenland, Dumoy ning syudad.

Ang biktima giila sa kapulisan nga si Arlene Remboran Sabpa, 34 years old, sakop sa Trigger Fist Sec. Agency ug taga- Tamped, Matalam, North Cotabato.

Sa interbyu sa RMN Davao kang Regional Crime Laboratory Office XI Medico Legal Officer PCI Nolan Genova nga nigula sa resulta sa awtopsiya nga blunt traumatic to the head ang gikamatay sa biktima.

Matud ni Genova nga posibleng bato ang gibunal sa ulo niini sa wala pa mailang suspek.

Gituohang anaa sa 8-12 ka oras na kining patay usa pa man kini nakit-an.

Adunay senyales nga nag-antos pa ang biktima una pa kini nakutluan sa kinabuhi ug posibleng nakasukol pa ang maong gwardiya ngadto sa suspek.

Ang issued nga .38 nga rebolber sa biktima narekober sa Talomo PNP sulod sa iyahang quarter.

Samtang, gibutyag ni Talomo PNP station commander PCI Ronald Lao nga aduna silay persons of interest nga ginasubay karon.

Gipasalig ni Lao nga ilang himuon ang tanan aron madakpan kining suspek ug aron masolbad usab ang maong kaso.

RadyoMaN Aimee Guinita

Facebook Comments