Davao City – Nasikop sa kapulisan sa Panabo ang usa ka grade 7 student human nga matud pa usa sa mga responsable sa mga insidenteng pagpangawat kun snatching sa lugar.
Sa report gikan sa Panabo PNP, giila ang dinakpan nga si Wawie Ladroma Buhawe, 18 anyos ug residente sa Purok 27, Barangay San Vicente, Panabo City.
Subay sa imbestigasyon nga nagpahigayon og checkpoint ang team sa Panabo PNP bandang alas 3 sa kadlawun kagahapon sa Crossing Bagdad, Barangay San Pedro sa maong lungsod, miagi ang nasangpit nga studyante apan misulay og ikyas hinuon dali gihapong nadakpan sa otoridad.
Sa dihang gihiling ang dinakpan, nakuha gikan sa iyaha ang sumpak diin gituohang miyembro kini sa Estokoy Group nga maoy responsable sa mga nagapanghitabong snatching incidents sa lugar.
Sa karon, balhug na sa prisuhan si Buhawe ug gikatakdang pasakaan og kaso.
Samtang giulan og komento ang usa ka post sa netizen sa facebook nga si alyas Yaf kalabotan sa nagapanghitabong snatching sa Panabo diin matud pa ubay-ubay na ang mga nabiktima ilabi na ang mga nanarbaho o nagauli og kadlawun.
Naglaum karon ang mga taga Panabo nga gawas sa pagkasikop sa gituohang miyembro sa snatching group, mas tutukan pa sa kapulisan sa area ang pagbantay sa palibot kun pag roving, pagkasikop sa uban pang responsable sa nasangpit nga insidente, ug mas palig-unon pa ang police visibility.
RadyoMaN Renz Barbarona
