Davao City – Giklaro karon sa Department of Education (DepEd-XI) nga aduna gihapoy ipahigayong Graduation Rites or Commencement Exercises sa Grade 6 pupils alang sa School Year 2018-2019 samtang sa Kindergarten gitawag na kini nga ‘Moving Up Ceremony.’
Sumala ni Jenelito Atillo, DepEd Spokesperson, anaa gihapon ang graduation ceremony ug nga dili kini mamahimong wad-on tungod kay usa kini ka memorableng panahon sa kinabuhi sa estudyante ug ginikanan sa rason nga nakatapos na gayud sa pagtoon ang ilang mga anak apan mas maayong likayan ang bongga o dagkung galastohanan panahon sa graduation.
Usab nagpasidaan si Atillo ngadto sa tanang mga magtutudlo ug principal sa pampublikong tulonghaan nga dili mangolekta og graduation fees gikan sa mga ginikanan subay sa ilang palisiya.
Hinoon gitataw ni Atillo nga kung duna man ugaling amutan ipaagi lamang kini sa panagsabot-sabot sa Parents Teachers Association (PTA) diin gikinahanglang boluntaryo lamang kini.
RadyoMaN Bernard Pantallon
