Davao City – Ginatugtan sa Department of Education (DepEd) ang pagtambong sa mga politiko diha sa graduation kinsa mukandidato sa umaabot nga eleksyon kung kini na-identify na sugod pa lamang sa school year.
Kini ang gitino karon ni DEPED-XI Spokesperson Jenielito Atillo atol sa AFP PNP Presscon nahitabo adlaw’ng Miyerkules, Marso 13, kinsa nagpasabot nga walay kontrol ang tulunghaan kung unsa ang posibleng iingon sa maong bisita ingon man ang presensya pa lamang niini magsilbi nang kampanya.
Gani sugyot ni Atillo sa mga tulunghaan partikular ang mga principal kinsa muila sa mga speaker sa graduation nga likayan na lamang ang pag-imbita sa mga politiko ilabi na ngadto sa mga mudagan sa umaabot nga eleksyon.
“Let me remind you that’s an election offense and that’s an administrative sanction for whosoever will be guilty for that,” pahinumdom niini.
Dugang niini nga gidili usab ang pagpanghatag og mga ribbon ug medals nga adunay pangalan sa mga politiko nga mukandidato.
Gitataw usab sa tigpamaba sa DepEd-XI nga ginaprayoridad nila ang mga pampublikong eskwelahan sanglit ilawom kini sa gobyerno diin kini ‘apolitical’ apan gi-awhag niini ang mga private schools nga mamahimong wais sa ingon ining hisgutanan.
RadyoMaN Jason Amisola
