Grass fire na Muti

Temporaryamente ya estangca el maga vejiculo na calsada del Muti, Lunes aga despues ya tene un grande grass fire.
Na report ya recivi el RMN Zamboanga ya comensa el fuego alas 7 del aga donde serca na mismo detachment del maga soldao.
Asegun na report tiene quien ya pone fuego na sacate seco y ya queda este bien grande hasta ya bula el chispas na otro lao del calsada y ya arde tambien el maga sacate seco.
El fuego ya destrosa con el cuantos ponoy de saging, mangga y otro maga product siembrao na tiera.
Nohay mas pursigui pasa el maga vejiculo na calsada por el miedo profenso ay lambe el fuego na diila vejiculo porcausa abos lao del calsada el ta quema y diutay lang el camino.
Despues del mas de tres hora ya puede siempre fasigua con el fuego el maga miembros del bumbero quien ya responde na lugar.
Nohay quien ya sinti duelo fuera ya lang con el maga sacate y cuantos pono de mangga y saging el ya quema mientras losdemas yan lahup na calor del fuego.

Facebook Comments