Greyhound operation nisakmit ug mga kontrabando sa Cebu City Jail

Ubay-ubay nga mga ilegal nga butang ang nasakmit atol sa greyhound operation sa Cebu City Jail kaganinang kadlawon nga gilusad sa Bureau of Jail Management and Penology , kapolisan sa dakbayan sa Sugbu ug PDEA.

Lakip sa nasakmit gikan sa male dormitory sa city jail mao ang 13 ka cellphone , sigarilyo, lansang , martilyo ug uban pa .

Wa hinooy nakuha nga ilegal nga drugas ug drug paraphernalia atol sa pagsiksik sa selda sa mga lalaki nga piniriso.


Apan ang Jail Warden sa city jail nga si Supt Renante Rubio nibutyag nga nasumpo nila ang laing modus sa mga piniriso nga “fishing” sa pagpasud ug sigarilyo nga maoy kusug nga negosyo sud sa bilangguan .

Gipasabot ni Rubio nga ang buhaton sa mga priso mao ang paggamit ug nylon nga maoy ihigot sa pinutos nga sigarilyo gikan sa gawas unya bitaron paingon sa sud sa prisohan nga sama gyud ug namasol .

Gibutyag ni Rubio nga tungod kay menos na kaayo ang shabu sigarilyo ang halinon sud sa prisohan nga mopresyo ug gikan P100 ngadto sa P120 matag stick kung magnihit na.

Facebook Comments