Davao City – Mireklamo sa presinto tres ang usa ka GRO sa KTV bar mahitungod gikulata sa iyang customer gumikan sa pagbalibad nga magkig-hilawas.
Sa blotter sa Talomo PNP, giendorso sa mirespondeng kapulisan ang biktima nga si alyas Liza, 21 anyos, dalaga, GRO nagpuyo sa Brgy. Talomo, Davao City, ingun man ang suspek nga customer nga si alyas Noli, residente sa Sitio Felomina, Brgy. Catalunan Grande, Davao City.
Sumala ni alyas liza nga kadaghan mihangyo si alyas Noli kaniya nga makighilawas apan gibalibaran niya tungod kay aduna siyay menstruation.
Apan nasuko ang suspek kay wala mutoo sa rason sa biktima ug kalit nga gilabnot ang buhok sa GRO dayong giparok ang agtang niini sa konkretong bongbong sa VIP room sa maong KTV bar.
Milugnot ang biktima ug gibiyaan ang iyang customer dayong pangayo ug tabang sa ilang floor manager nga maoy nanawag og kapulisan.
Puthaw nga bugnaw ang gihinol-hinol karon sa suspek sulod sa detention cell sa Talomo PNP samtang ang biktima gipakuha og medical certificate tungod kay nibati kinig pagpanglipong ingun man paglabad sa iyang ulo.
RadyoMaN Erin Lumosbog
