Ginhiwat kaina sang aga ang groundbreaking ceremony para sa sanitary landfill sang Passi City .
Natigayon ang kapin 300 milyones pesos nga balor sang proyekto pinaagi sa Public-Private Partnership upod ang Basic Environment Systems Technologies, Inc. (BEST) sa idalom sang IPM group of companies.
Suno kay Passi City Vice Mayor Jesry Palmares, wala nagapamatok ang mga pumuluyo sa nasambit nga proyekto bangud ipahamtang ang sanitary landfill sa 22 ka ektarya nga lupa sa Brgy. Aglalana , nabukid nga bahin sang Passi sa diin wala gawa sang mga pumuluyo .
Dugang pa ni Palmares nga makaamodar sang 1,000 tons sang basura kada adlaw ang sanitary landfill gani sarang man sini maakomodar ang mga basura halin sa 27 ka mga banwa sa probinsya nga amo ang Anilao, Ajuy, Banate, Barotac Nuevo, Badiangan, Bingawan, Cabatuan, Calinog, Dingle, Dueñas, Dumangas, Janiuay, Lambunao, Maasin, Mina, Pototan , San Enrique, Balasan, Barotac Viejo, Batad, Carles, Concepcion, Estancia, Lemery, San Dionisio, San Rafael kag Sara .
