Pormal na’ng gibalibaran sa grupo ni Cong. Freddie Siao ang imbitasyon sa Commission on Elections alang sa usa ka candidates’ forum.
Kini alang sa mga kandidato sa pagka-kongresman, pagka-mayor ug bise mayor, ugmang adlawa, Abril 27, sa may Rizal Park o public plaza.
Sa iyang sulat ngadto sa COMELEC kagahapon, nga gipa-ambit ngadto sa mga sakop sa media, nakalatid nga ‘short notice’ o ang kamubo sa panahon sa pagpadala sa imbitasyon ang hinungdan.
Abril 24 nadawat sa buhatan ni Siao ang maong sulat-imbitasyon, Abril 25 o kagahapon ang kumpirmasyon niini.
Dili na ma-adjust, matud pa, sa grupo sa ‘Solid Blue’ ang schedule sa ilang mga campaign sorties tungod usab kay nagkaduol na ang eleksiyon.
Kinahanglan, matud pa, nga masudlan sa grupo ang tanang dapit sa Iligan, alang sa ilang kampanya, aron mapaabot ngadto sa katawhan ang plataporma ug plano sa ‘Solid Blue’ alang sa dakbayan.
Giklaro ni Siao sa maong sulat, nga usa ka maayong kahigayonan ang mga forum nga susama niini aron mapaabot ang mga programa ug plano ug matubag ang mga isyu nga adunay kalambigitan ang siyudad.
Andam, matud pa, ang iyang grupo nga motubag sa mga pangutana sa maong forum, kung ihatag kini ngadto kanila human sa forum, aron ipaambit pinaagi sa nagkalain-laing platform, lakip na sa social media. (Divina M. Suson/DXIC RMN Iligan)
