Nanawagan ang pipila ka grupo sa mga internally displaced persons sa Marawi City ngadto sa Commission on Appointments nga i-hold in abeyance una ang kumpirmasyon ni Task Force Bangon Marawi Chairman Eduardo Del Rosario isip kalihim sa Department of Human Settlements and Urban Development o DHSUD.
Kini nga departmento mas naila kaniadto nga Housing and Urban Development Coordinating Council o HUDCC.
Matud pa ni Drieza Lininding, convenor sa usa ka civil society group nga Moro Concensus Group, ilang ipa-hold ang appointment ni Del Rosario hangtud nga dili ma-resolba ang mga isyu ug ang mga kontrobesiya sa rehabilitasyon sa Marawi human kini maguba tungod sa lima ka bulan nga giyera niadtong 2017.
Gipapanubag sa grupo si Del Rosario tungod matud pa sa mga bakak ug pagpangilad nga nakapasamot sa ilang pag-antos.
Pananglitan niini mao ang gisulti ni Del Rosario sa nakalabay’ng hearing sa Senate Special Committee for Marawi nga nagpabilin ang mga footing o mohon sa mga building o structures nga lakip gi-demolish aron sayon pag-ila sa tag-iya.
Usa kini, matud pa, ka dakung bakak tungod kay matud pa sa mga nakasulod, wala nay mga timailhan sa boundary o daluna sa ilang yuta o lote.
Gihulat usab karon sa mga IDPs ang gisaad ni Senator Ronald Dela Rosa ug Christopher Go nga ipahigayon sa Malacañang ang panagtagbo kauban si Presidente Duterte, mga IDPs ug mga opisyal sa gobyerno ug LGU, aron tuki-on ang kabahin sa Marawi rehabilitation. (Divina M. Suson, DXIC Iligan City, March 2)
