General Santos City—gipaabot nalang matud pa sa General Santos City Police Office (GSCPO) ang mga patrol nga gisaad kanila sa lokal nga panggamhanan sa syudad human nga 4 ka mga Police Station sa Gensan ang wala nay ginagamit nga patrol car tungod sa daan na ug pipila niini guba na.
Sumala pa ni PCI Jovenson Bayona ang tigpamaba sa General Santos City Police Office nga sa pagkakaron anaa palang matud pa sa procurement ang LGU sa mga patrol car nga ihatag kanila.
Ginatun-an pa usab kung unsa nga brand ug unsang matang sa sakyanan ang ihatag kanila kansa muhaum sa ilang gamitan niini.
Nagpaabot pa usab ang GSCPO sa patrol nga car nga ihatag sa National Headquarters kung diin gibana-banaang mahatag sa ilahang opisina sa unang quarter sa tuig 2018.
Dugang pa ni Bayona nga sa iyahang nasayran nga ang 8 ka mga estasyon sa kapulisan ang makadawat ug patrol car apan unahon lang una ang mga estasyon nga guba na ug dili na mapuslan ang patrol car. (Dave Silagan)
