Pitogo, Zamboanga del Sur –
Gumikan lang sa katol nga wala mapalong duol sa kama nga gituohang nasindolan maoy nakaingon sa pagkasunog sa usa ka balay sa Purok Caimito, Brgy. Poblacion, Pitogo, Zamboanga del Sur alas 12:00 kagabii.
Sa impormasyon nga nahipos DXPR NEWSTEAM gikan sa kadumalahan sa Municipal Disaster Risk Reduction and Management Office (MDRRMO) Pitogo, naugdaw ang balay nga gipanag-iyahan ni Jerry Bangcali.
Subay sa pasiunang imbestigasyon, ang katol nga wala mapalong sulod sa kwarto maoy ilang gisubay sa nagpadayon nga imbestigasyon nga maoy posibleng hinungdan sa sunog.
Tungod kay ginama sa light materials ang maong balay, dali kaayo nga midako ang kalayo hinoon wala na kini makakatay sa kasikbit nga kabalayan.
Gumikan sa hitabo walay napupho ang pamilyang Bangcali dihang wala madala og sablig sa tubig ang kalayo.
Gibana-bana nga mokantidad sa 100,000 ang danyos sa maong sunog.
Nitunol na usab og tabang nga mga relief goods ang ginsakpan sa MDRRMO Pitogo ngadto sa nasunugan nga pamilya. (RadyoMaN Kenneth Bustamante)
Photo Credit to MDRRMO Pitogo
