TACLOBAN CITY – Magtitikang na yana nga adlaw an mahugot nga checkpoint operation han Philippine National Police ngan Gun Ban ini in may paghisumpay han Barangay ngan SK Election.
Ha interview han RMN kan PCInsp. Rex Cantillep, Tacloban PNP Deputy City Director for operations, titikangan na nira pag-implementar han Election Law para han peace and order yana nga eleksyon.
“Ipapatuman naton iton Election Law, ha ilarom hini diri pwede magdara hin armas ngan deadly weapon.”
Ha checkpoint operation han PNP ha Tacloabn, mayada checkpoint areas kun diin magbabantay iton mga otoridad ha Marasbaras, Imelda ngan Diit.
Igpapatuman gihapon an Liqour Ban, karuyag sidngon iginbabawal an pag-inom ha mga pampubliko nga lugar ngan ha kakalsadahan ha adlaw mismo han eleksyon.
Popokusan gihapon han PNP an Gun Ban kun diin diri pwede magdara hin armas bis ka pa pa mayada permit ngan lisenya, labot nala kun ikaw in naka-uniporme nga pulis o sundalo ngan nakakuha hin permit to carry tikang ha COMELEC.
