General Santos City–Patay sa pagpamusil ang 33 anyos nga security guard sa usa ka parmasya sa Aparente Street, Barangay City Heights Gensan pasado alas 11:00 sa gabie, adlawng Domingo, Nobyembre 25, 2018.
Giila ang biktima nga si Jonifer Mercado, legal age, gwardya ilawom sa Seabren Security Agency ug residente sa PBMA Compound, Purok Bagong Silang, Barangay Baluan.
Takda na mag-duty sa iyang trabaho ang biktima dihang kini gipusil sa gunman duha ka beses igo sa iyang ulo hinungdan sa iyang kamatayon.
Gisulayan pa ang biktima nga i-revive sa nagrespondeng emergency medical service sa Rescue 727 apan tungod sa grabeng samad niini sa ulo nakabsan gyud kini ug kinabuhi.
Sa pagsuta sa SOCO narekober ang duha ka fired cartridge sa .45 caliber pistol duol sa patayng lawas sa biktima.
Gikaingong Intact ang mga personal nga gamit sa biktima nga gilangkuban sa iyang motorsiklo nga naka-center stand gawas sa parmasya ingon man ang issued firearm niini nga .38 caliber revolver.
Sa karon padayon ang gihimong imbestigasyon sa kapolisan samtang usa sa mga motibong gitan-aw karon sa PNP ang bahin sa pagpanimalos human nga si Mercado matud pa maoy nidakop sa usa ka lalaking nagmaoy ug nangilog ug pusil sa maong lugar pipila ka simana na ang nakalabay.
