General Santos City—balhog sa silda sa Police Station 6 ang usa ka gwardya human nga nakuhaan kini ug bala sa kalibre 38 nga pistola sa entrance nga bahin sa KCC mall of Gensan.
Ang gwardya giilang si Alexander Leyva, 57, Security guard ilawom sa RQA Security Agency ug lumulupyo sa Barangay Maribulan, Alabel, Sarangani Province.
Nasayran nga alas 3:30 ang takna sa hapon kagahapong adlawa, Domingo, misulod sa KCC mall of Gensan ang nasangpit nga gwardya, iyang gibutang sa scanner ang iyang bag ug didto nakit-an sa mga gwardya ang 19 ka mga bala sa pusil.
Didto na gisikop ang suspek ug giturn-over ngadto sa kapulisan nga naasign usab sa entrance nga bahin sa mall.
Sumala sa gwardya nga ang bala sa pusil iyaha sa ilang kumpanya nga gipataguan ngadto kaniya sa ilang head guard. Nakalimtan matud pa niini nga sa iyang bag niya gibutang ang maong mga bala.
Nasayran nga hugot ang seguridad nga gipatuman kagahapong adlawa sa mall tungod na usab sa selebrasyon ni Senador Manny Pacquaio.
