General Santos City—samdan ang usa ka gwardya human naunay sa iyang pusil samtang kini anaa sa iyang duty sa Pacman Beach Resort nga nahimutang sa Barangay Tinoto, Maasim, Sarangani Province.
Ang biktima nailhang si Arjay Sumbra, 28, residenti sa Koronadal City ug gwardya sa Pacman Peach Resort.
Alas 2:00 ang takna kaganinang kabuntagon samtang nagroving ang nahisgutang gwardya sa maong resort kalit lang matud pang mibuto ang iyang service firearms nga 9mm nga pistol.
Nakaangkon ug samad sa iyang tiil ug sa iyang kamot ang nasampit nga biktima human sa insidenti.
Paspas nga gidala sa iyang mga kaubanan ang biktima sa St. Elizabeth Hospital ug pabilin na karon nga gipailawom sa medikasyon.
Samtang ginasuta pa sa Maasim Municipal Police Station ang hinungdan sa kalit-kalit nga pagbuto sa pusil sa nasangpit nga gwardya.
