Davao City- Tungod sa padayong pagkapuno sa COVID-19 beds sa Southern Philippines Medical Center (SPMC) gi-convert karon ang gymnasium sa SPMC-Institute of Psychiatry and Behavioral Medicine (IPBM) sa Bajada ning syudad ngadto sa COVID-19 isolation ward.
Gibutyag ni Dra. Marie Yvette Barez, SPMC Infection Prevention and Control Unit head, 30 ka mga beds ang kasamtangang ginaplastar karon aron mabalhin ang ubang mga pasyente.
“Step down ni siya para katong mga pwedi na tanggalon ang intensive management, mga naka-2 liters nalang ang oxygen o mga wala na naka-oxygen para didto na sila ibalhin,” matud ni Barez.
Sumala niini, anaa na sa 100% ang capacity sa COVID-19 ICU beds kun occupied na og mga pasyente ang tanang 92 beds diin dinhi gi-admit ang mga severe ug critical patient sa COVID-19.
Target sa SPMC nga maablihan na ang dugang 30 ka mga COVID-19 ward beds sunod semana.
Sa datus sa SPMC sa June 23,2021, 95.57% ang occupancy rate sa mga ward beds kun sa 361 beds, 345 na ang occupied.
Mokabat sa 740 ang total deaths, 6,707 ang total recoveries, 7,806 ang total cases samtang dul-an 400 ang kasamtangang naka-confine nga mga active COVID-19 positive sa SPMC.
RadyoMaN Aimee Guinita
