General Santos City—patay ang usa ka habal-habal driver human kini gipusil saw ala pa mailhing suspetsado samtang naglingkod gawas sa barber shop nga nahimutang sa Crossing Conel ning syudad alas 2:50 ang takna sa hapon, Hwebes, July 20, 2017.
Ang biktimang namatay nailhang si Ernesto David, 47 anyos, residenti sa Purok Malinawon, Barangay Conel, Gensan.
Subay sa report sa Police Station 3 sa pagpanguna ni Police Sr. Inspector Cesar Penalgan Jr., Chief Of Police nga naglingkod ang nasangpit nga biktima gawas sa barber shop, diin nahimutang ang terminal sa mga Habal-Habal padulong sa sentrong bahin sa Barangay Conel, kalit lang miabot ang usa ka wala mailhing suspek dayon gipangutana ang biktima kung unsay iyang pangalan.
Dihang gibutyag sa biktima ang iyang pangalan, kalit kining mibunlot ug pusil dayon gipusil upat ka higayon ang biktima igo sa iyang ulo, liog ug dughan nga hinungdan sa iyang kamatayon.
Damay usab ang barbero nga si Tommy Paris, 39, residenti sa Crossing Conel, Barangay Lagao kansa nakaangkon ug samad sa iyang bitiis human milusot ang bala sa pusil sulod sa barber shop. Gilayong gidala sa ospital ang biktima samtang ang suspek, paspas nga misibat human sa insidenti.
Sumala ni PSI Penalgan nga basi sa impormasyon nga ilang nakalap nasayran nga anaa sa drug watchlist sa Police Station 4 ang biktimang si David, apan ila pa kini karon nga gina-validate aron nga masuta kung lambigit ba gyud kini sa iligal nga druga.
Sa kasamtangan nagpahigayon nag makuting imbistigasyon ang kapulisan kalabutan sa insidenti ug ilang sutaon ang pipila ka mga anggulo nga posibling hinungdan sa pagpatay.
