Davao City- Pagpanulis ang motibo sa pagpusil-patay sa usa ka habal-habal driver base sa pasiunang imbestigasyon sa mga kapulisan sa Buhangin PNP.
Natigayon ang pagpamusil sa wa mailhing suspect kaganinang kaadlawon alas 4:45 sa buntag diin nakaplagan na lamang ang patayng lawas sa usa ka Edwardo Vargas dela Torre, 52 anyos nga taga- Dahlia St.Ladislawa Village Buhangin ning dakbayan.
Ang biktima nakaangkon og duha ka igo sa ulo ug walo ka samad pinusilan sa tiyan nga bahin resulta sa iyang hinanaling kamatayon. Gawas niini, gikuha pa sa wa mailhing suspect ang belt bag ingon man ang motorsiklo nga gidrayban sa biktima.
Narecover sa SOCO team gikan sa crime scene ang tulo ka basiyo sa bala sa maong insidente.
Padayong naglusad og halapad nga imbestigasyon ang Buhangin PNP aron masayran ang identity sa suspetsado nga mipusil sa biktima.
Kasamang Don Pulayao
