Davao City – Angayan na nga papaulion ngadto sa ilang tagsa-tagsa ka mga lugar ug pamilya ang mokabat sa 400 ka mga Indigenous Peoples (IPs) kun mga lumad kinsa anaa karon sulod sa United Church of Christ in the Philippines (UCCP) Haran evacuation center, Fr. Selga Street, ning dakbayan.
Matud ni 1003rd Brigade Commander Col. Nolasco Mempin, bulnerable ang mga IPs sa eksploytasyon ingon man propaganda sa New People’s Army (NPA) mientras naa sa maong pasilidad.
Giklaro ni Mempin nga walay militarisasyon sa Talaingod ug Kapalong, Davao del Sur ug sa uban pang mga dapit sukwahi sa gi-alegar nga rason nganong napugos pagbiya ug pag-estar ang mga lumad diha sa Haran.
Gitino ni Mempin nga ang pagpapauli sa mga IPs muagi og due process kun ensaktong proseso.
Sa pikas bahin, gitin-aw ni Davao City Police Office (DCPO) director Col. Kirby John Kraft nga wala nang-harrass ang kapulisan kinsa gi-deploy ngadto sa UCCP evacuation center niadtong Sabado.
Matud ni Kraft, gipang-deploy ang kapulisan sa UCCP Haran aron maseguro ang kalinaw sa nasangpit nga lugar.
Anaa sa lima ka mga ‘bakwits’ sa Haran kumpirmadong niuban pauli kang Davao del Norte Gov. Edwin Jubahib ngadto sa ilang komunidad.
Walay natalang na-injure atol sa nahitabong komosyon niadtong Sabado ug wala usay narekober nga ‘bladed weapons’ diin gipangkapkapan ang mga nisulong sa Haran aron kuhaon ug luwason ang ilang mga paryenteng nagkampo sa maong dapit sa taudtaud nang panahon.
RadyoMan Aimee Guinita
