Davao City – Gipanghimakak sa head coach sa volleyball team sa Davao Oriental delegation nga ilang gipasagdan ang namatay nga magtutungha sa nagpadayon nga DAVRAA 2019 rason nga dili siya ang mahayon.
Sumala ni Mae Joesel Duro nga wala na nila padulaa si alyas Anie tungod kay sa unang adlaw sa ilang pag abot sa Imelda Elementary School sa Brgy Sto. Niño nagreklamo na ang namatay sa iyang ubo busa ila na kining gipapahuway.
Matud ni Duro nga iyang gipahiling sa assigned school nurse ang dose anyos ug dayon kining gihatagan og tambal sa ubo lakip na antibiotic.
Gidugang ni Duro nga wala sila magtuo nga grabe na ang gibati sa namatay nga atleta tungod kay nag isyu na si Lupon Municipal Health Officer Dr. Belen Larubis og medical certificate nga physically fit ug mahimong makadula si ang batan-on.
Apan gibutyag sa usa ka teammate niini nga matag gabie gawas sa hilabihang ubo maglisud na sa pagginhawa ang atleta hangtod kini nagsugpa og dugo.
Si Anie namatay tungod sa sakit nga pneumonia sukwahi sa unang nabalita nga gitakboyan kini sa severe dengue.
Ang Davao Oriental Volleyball Girls Team na eliminate na sa DAVRAA meet kansang si alyas Anie unta ang ilang open spiker.
RadyoMaN Erin Lumosbog
