HEALTH HAZARD | Vape, indi maayo nga alternatibo sa “yosi” suno sa DOH!

197

Roxas City, Capiz – Kasunod sang ginaproponer nga pataasan ang buhis sa sigarilyo, nagpaandam subong ang Department of Health (DOH) sa publiko nga indi maayo nga alternatibo ang vape okun e-cigarettes sa sigarilyo.
Suno kay Health Undersecretary Eric Domingo, kaangay sang sigarilyo, may yara man sang nicotine ang vape nga mahimo magdulot sang adiksiyon sa naga-usar sini. Ini ang pilegroso sa ikaayong lawas sang naga-usar.
Mahibaloan nga gin-aprobahan ni P-Rodrigo Duterte ang proposal sang DOH kag Department of Finance nga taasan ang excise tax okun buhis sa alak kag sigarilyo.
Suno kay Finance Assistant Secretary Tony Lambino, ginahulat na lamang ang substitute bill halin sa Kongreso nga target isahon ang magkatuhay nga bersyon sang mga hagna nga tuyo pataasan ang buhis sang kada pakete sang sigarilyo.
Sa idalom subong sang Tax Reform for Acceleration and Inclusion Law, yara sa P35 ang gindugang nga buhis sa kada pakete sang sigarilyo.
Siling ni Lambino nga mas pabor sila sa bersyon sang proposed bill ni Sen. Manny Pacquiao nga luyag ipataas sa P60 ang buhis sa sigarilyo.
Suno sa Department of Finance, pinaagi sa mas mataas nga buhis sa sigarilyo, makakolekta ang gobyerno sang bastante nga pondo para sa universal health care program.
Samtang, ginpabutyag man ni Domingo nga dapat na nga i-regulate ang paggamit sang vape okun e-cigarettes sa sigarilyo.

Facebook Comments