Davao City – Giangkon karon sa Department of Health (DOH-XI) nga taas ang kaso sa tipdas sa rehiyon sukad sa bulan sa Enero hangtud sa bulan sa Pebrero karong tuiga itandi sa miaging tuig.
Gibutyag ni DOH-XI Regional Director Annabelle Yumang nga base sa ilang records, muabot na sa 52 ka kaso sa tipdas ang natala dinhi sa atong dapit.
Sa maong ihap, ang Davao City maoy nakatala og mas taas nga kaso sa tipdas human miabot og 32 ang natakbuyan sa balatian gikan sa upat ka barangay sa ikaduhang distrito ning siyudad.
Sa 32, usa ka one-year-old nga bata nga taga-Tibungco ang namatay sa nasangpit nga sakit diin sagad sa mga naigo ang pinakabata nag-edad og one-year-old ug ang pinakatigulang nagpangidaron og 65 anyos.
Giingon ni Yumang nga ang bata nga namatay wala maturokan og bakuna nga panguntra sa virus sa tipdas hinungdan nga wala na kini masalba pa sa gipatambalan nga ospital.
Gipasabot sa director nga dili makumpiyansahan ang virus sa tipdas nga makuha gikan sa hangin ug pagtakod gikan sa uban kay maghatud kini sa kamatayon hilabi na sa mga bata.
Dili garantiya nga kun nabakunahan na dili na maigo sa sakit apan ang maayo lang kay ang immune system sa hamtong makasukol sa virus diin dili pareho sa bata nga pildihon sa virus.
Tungod niini, mas gipakusgan pa karon sa DOH-XI ang ilang pag-adto sa barangay aron magbalay–balay sa pagpasabot sa benepisyong makuha sa bakuna, dugang ni Yumang.
Gidasig karon sa opisyal ang mga ginikanan nga kadtong ilang mga anak nga wala pa mabakunahi nga dad-on sa mga health centers ang ilang mga kabataan matag Miyerkules aron maluwas sila sa kamatayon hatud sa sakit nga tipdas.
RadyoMaN Joel Viray
