Davao City – Luwas kaha ang mga Dabawenyo gikan sa hulga sa terorismo kung ang mga tigpanalipod sama sa Task Force Davao kuwang sa modernong mga kagamitan?
Si Task Force Davao Deputy Commander Lt. Col. Randolf Cabangbang nagbutyag nga kuwang gayod sa kagamitan ang ilang mga checkpoints nga naka-montar sa tulo ka ganghaan kun entry-exit points sa siyudad sa Dabaw.
SumaLa ni Cabangbang nga wala na silay nagamit nga metal detectors tungod kay guba na ug gipaningkamotan nga maayo ang nasangpit nga mga kahimanan aron subling magamit sa mga checkpoints.
Dugang ni Cabangbang nga duha na lang pod ang ilang K-9 dogs ug wala sab sila’y ‘walk-through scanners’ nga angay unta imontar sa mga checkpoint areas aron dali makita ang gipangdala sa mga pasahero sa mga de-pasaheroan sama sa bus nga musulod dinhi sa dakbayan.
Suma sa opisyal nga ila nang napaabot ang ilang hangyo nga modernong kagamitan ngadto sa lokal nga kagamhanan ug nagpaabot na lang sila sa tubag labot sa ilang gipangayong mga gamit kontra terorismo.
Samtang wala pa’y igong modernong kagamitan ang Task Force Davao, si Cabangbang nag-ingon nga ilang gikatag sa tibuok siyudad ilabi na sa sentrong bahin ang ilang mga sakop aron mabantayan ang dakbayan.
Si Cabangbang miapelar sa mga Dabawenyo nga adaptahon ang kinaiya sa pagka-igmaton kay makatabang kini sa pagpugong sa mga terorista nga magsabwag og kaguliyang sa atong dapit.
Matud ni Cabangbang, dili dautan ang pagbaton og batasan nga vigilant sanglit mao kana ang gikinahanglan sa presenteng panahon kay aron paspas muabot sa mga hingtungdan ang ilang obserbasyon.
Unta kung nagpakabana lang ang mga tawo hayan napugngan na unta ang pagbusikad sa bomba nga gipaboto sa mga terorista sa internet café sa Isulan, Sultan Kudarat kung asa duha ang patay ug daghan ang samdan.
Giangkon ni Cabangbang nga adunay mga panahon nga malutsan ang kapulisan ug militar sa terorista bisan og unsa ka hugot ang gipatuman nga seguridad sama sa nahitabo sa Isulan, Sultan Kudarat.
Apan kung ang publiko madudahon, dako ang purohan nga mapugngan ang mga terorista sa ilang pagpa-boto og bomba ug walay mga inosente mapagan sama sa nahitabo sa Isulan.
Busa apelar ni Cabangbang ngadto sa publiko nga makigtimbayayong kanila diha sa kampanya kontra terorismo aron walay laing pagpamomba mahitabo dili lamang sa Isulan apan lakip na dinhi sa siyudad sa Dabaw.
RadyoMaN Joel Viray
