Ay bira otraves el usada del helmet del mga motorista na ciudad de Zamboanga masquin nohay pa acaba el fiesta Pilar.
Este ya bene despues ya pasa el resolution el consejo local denantes na diila regular session donde tan recall con el diila mas temprano resolution del Agosto donde ta manda man relax el usada del helmet dentro del ciete kilometro para el seguridad del fiesta.
Na boto ocho (8) pabor y tres (3) contra ya pasa el resolution que ta hace no bale nada con daan resolution despues el Department of Interior and Local Government (DILG) ya hace sale memorandum order que ta ordena el full implementation del Helmet law.
Si Consejala Jihan Edding amo yan sponsor el recall resolution mientras canda consejal Cesar Sang Jimenez, Rudy Lim, y Pinpin Pareja ya bota contra na recall.
Si ta acorda ustedes si consejala Pinpin Pareja como chairman del committee on Peace and Order amo quién yan sponsor con el resolution donde ta manda man relax el usada del helmet por el rason de seguridad durante el periodo de fiesta Pilar.
