BACOLOD CITY – Igadumili ang pagsuksok sang helmet sa mga naga-maneho sang motorsiklo sa sulod sang tatlo ka adlaw durante nga ginapatigayon ang ASEAN summit meeting diri sa ciudad sang Bacolod.
Ginpahayag ni Bacolod Traffic Authority Office (BTAO) Head P/Supt. Luisito Acebuche nga ang restriction magasakup sa venue kag billeting areas sang mga delegado sa ASEAN summit sumugod March 21 tubtub 24.
Ginpaathag ni Acebuche nga ang temporaryo nga pagpahukas sang helmet sa mga nagasakay sa motorsiklo nga nagaagi sa designated areas ang kabahin sang security measures sang pulis para malikawan ang krimen kag para man sa safety sang mga magatambong sa amo meeting.
Pero pagkatapos sang summit, balik naman sa full operation ang BTAO sa pagpangdakop sa mga wala sang helmet. Sa record nagaguwa nga sa 372 ka motorcycle-related incidents, 272 gid ang nagkalamatay bangod wala nagasuksok sang helmet. /dyHB – BACOLOD
