General santos City–Gihingusgan ni Police Captain Abdulsalam Mamalinta ang hepe sa Police Station 1 nga usa ka lihitimo nga buy-bust operation ang ilahang gihimo batok sa usa ka alyas Bugnot kon Carmelo Morta , 27, nga nanimuyo sa Prk. 2 Lanton, Barangay Apopong ning syudad kansa gikaingong misukol sa kapulisan hinungdan nga napusilan ug nakabsan sa iyahang kinabuhi.
Napalitan matud pa nila ug usa ka sachet sa gituohang shabu, ug nakuhaan usab kini ug laing unom pa ka sachet sa gituohang shabu, buy-bust money ug usa ka unit sa cal. 38 revolver.
Samtang gipaimbistigahan naman usab ni Captain Mamalinta ang aligasyon sa kabanay ni Alias Bugnot nga gikuha sa duha ka lalaki ang nasampit sa iyahang trabahuan pipila ka oras ayha nahitabo ang Buy-bust operation.
Dugang pa niini nga sa iyahang nakita ang hulagway sa CCTV Footage ug gikumperma niini nga dili siya pamilyar sa mga nawong sa mga nikuha sa namatay nga target.
Posible matud pa nga kauban lang sa nahisgutan ang maoy nikuha kaniya tungod usab sa ilahang wala nahuman nga mga transaksyon sa droga.
Basta ang sigurado lang matud pa ni Captain Mamalinta nga ilahang napalitan ang nahisgutan ug misukol kini sa ilahang operasyon hinungdan nga namatay.(Dave Silagan)
