Panguhan na og bag-ong direktor ang Cebu Provincial Police Office kun CPPO sugod karong adlawa .
Kini gumikan sa pagtakda na sa kasamtangang hepe niini nga si Police Senior Superintendent Eric Noble ngadto sa bag-ong assignment niini gawas sa nasud isip police attaché sa San Francisco, California sa Estados Unidos .
Si Police Senior Superintendent Edgar Alan Okubo na nga maoy hepe sa Regional Public Safety Battalion 1 maoy mohulip kang Noble isip CPPO Director.
Nahimong kabahin si Okubo sa PNP Class 1992 ug nahimo na sab nga kanhi direktor sa Pangasinan Provincial Police Office sa Region 1 .
Bisan niangkon si Noble nga ang iyang pagsilbi sa Cebu sud sa usa ka tuig nahimong mahagiton human gideklara ni Presidente Rodrigo Duterte ang lalawigan isip ‘drug hot spot’, nagpasalamat gihapon kini sa tanang Cebuanos nga mitabang sa kapulisan sa ilang mga operasyon batok sa ilegal nga drugas.
Niadtong Abril gitanyagan na si Noble sa posisyon nga police attaché gawas sa nasud ug gitakdang molarga na kini sa San Francisco aron magsilbi sa San Francisco Consul General human sa pipila ka buwan nga pagkumpleto sa mga dokumento niini isip diplomat .
