General Santos City–Giangkon karon ni Police Capt Brent Salazar- hepe sa San isidro Police Station nga sya maoy nakapusil patay sa rape suspek nga si Ronald Badal 30 anyos human matud pang misuway ug pangilog og armas sa usa ka pulis.
Matud ni Salazar nga mihangyo ang nasampit nga suspek nga mag-CR sulod sa ilang prisinto og giubanan kini sa pulis.
Apan gidasmagan matud pa sa suspek ang nahisgutan nga pulis og giilog ang pusil niini hinungdan nga gipusil nalang kini ni Capt Salazar.
Dugang pamahayag ni Capt Brent Salazar nga nakit-an gyud niya ang pagdinumugay sa pulis ug sa suspek tungod duol lang sa iyang opisina ang panghitabo.
Gani nailog na gyud matud pa sa suspek ang pusil og aron maprotektahan ni Salazaar ang iyang kaubang pulis ug ang iyang kaugalingon nakahukom kini nga unahan ug pusil ang suspek.
Gisuwayan matud pa nila kini pagdala sa ospital apan walay swerte nga nakabsan kini sa iyang kinabuhi.
Aminado usab si Police Capt Salazar nga sa interogasyon pa lang nga gipahigayon sa kapulisan daan na nga dili mahimutang ang suspek.
Positibo matud pa kining gitudlo sa singko anyos nga biktima sa pagpanglugos. Samtang pasakaan usab og kaso sa kapulisan ang amahan og iyaan sa biktima nga wala nagpakabana og gusto pang isekreto ang panghitabo.(Jordan Britos)
