El celebracion del compli-año del un 39-año de edad persona ya queda sangrino despues este ya tira consu hermano mayor amediante del diila tomajan na Sitio Mantayabas, barrio de Baluno, del Lunes tarde.
El pulis del Estacion de Sinunuc ya nombra con el suspechao como si Felix Isic y Francisco quien ta celebra el disuyu ica-39 año.
Si Felix ya tira consu hermano mayor si Roberto Isic y Francisco del mismo lugar. Ya sostene le irida de bala na su pierna lao derecha y ya lleva conele ensiguidas na hospital.
El pulis ya habla si Felix ya gana na gallera del Domingo y atiempo compli-año tambien disuyu del Lunes donde ya celebra este pormedio de man tomajan le junto consu maga hermano canda Roberto y Bernardo, banda alas 4:30 del tarde.
Pero cuando egual ‘cargao diila barco’ ya tene estos terquiajan entre si Felix y Roberto.
Amediante del diila descutijan, si Roberto ya saca su bolo y yah ace jalabas con el tres galio di Felix.
Porcausa deste, ya saca tambein si Felix consu pusil y ya tira con Roberto y ya tupa na su derecha pierna.
Despues el incidente ya escapa si Felix llevando consu pusil.
