Davao City – Makamatay matud pa ang sakit nga hernia o danlak og dili kini maoperahan.
Kini ang gibutyag ni Doctor Mike Villanueva, Davao Doctors Hospital Surgery Resident atol sa interview sa DXDC RMN Davao kaniya diin sumala sa doktor nga og maipit ang bituka, posibleng mamatay ang pasyente.
Ang hernia o danlak matud ni Dr. Villanueva mahitabo og adunay buslot ang tiyan diin asa mugawas ang bituka, taba ug uban pang organs nga posibleng maadto sa private parts sa tao diin makita niini nga dunay bukol sa singit o nagadako ang private part.
Dugang sa doktor nga ang hernia adunay duha ka klase, congenital o sukad sa pagpanganak pa lang, aduna nay buslot sa tiyan samtang ang ikaduha mao ang acquired hernia diin kini wala nakuha sa dihang gipanganak apan nagka-hernia tungod sa sige og karga og bug-at, ubo, pirmi constipated, luya ang abdomen nga maoy posibleng hinungdan sa pagbuslot sa tiyan ug paggawas sa mga bituka ug ubang organs nga maudto sa private part.
Matud niya nga adunay ubang tao nga dugay na adunay hernia diin asa sila makasinati og kalintura, suka, ug pagdako sa private part gumikan na diay to sa pagkaipit sa bituka.
Subay niini, tambag ni Doc Villanueva nga ipa opera ang maong sakit aron masirado ang buslot gumikan di na usab kini maagapan og dili ipailawom sa operasyon.
RadyoMaN Renz Barbarona
