Gisulod sa iyang tindahan ug dayon gipusil patay ang usa ka babaye’ng biktima didto sa Brgy. Camagong, Nasipit, Agusan del Norte bandang alas 9 ang takna kagabie.
Giila ni P/Capt. Franklin Lacana, hepe sa Nasipit Municipal Police Station ang biktima nga si Anita Salinsing, 34 anyos, residenti sa maong lugar ug usa ka sakop sa Tribung Higaonon.
Migawas sa imbistigasyon nga nagpatoo’ng customer nga mopalit sa tindahan ang suspek kinsa gihulagway nga bangason ug nagsuot ug pula nga T-shirt, dayon mipusil sa biktima gamit ang kalibre .45 nga pistol hinungdan sa kamatayon sa biktima.
Human sa krimen paspas nga mitungas sa bukirang bahin sa lugar ang suspek kinsa wala pa maila hangtud karon.
Gipahayag ni P/Capt. Lacana nga posibleng ang rebelding New Peoples’ Army (NPA) ang mipusil patay sa biktima sa wala pa usab matinu nga rason.
Giimbistigahan usab ang anggulo nga adunay nakaaway nga silingan ang biktima.
Sa karon hugot nga imbistigasyon sa kaso ang gikasa sa Nasipit PNP.
[image: nasipit pnp stn.jpg]
