Davao City – Gibansay na pipila sa mga personahe sa Land Transportation Office XI sa saktong paggamit sa high-tech nga speed gun.
Sumala ni LTO XI Regional Director Atty. Gomer Dy target nilang masugdan ang operasyon gamit ang bag-ong kahimanan karong abli sa klase.
Giisyu ang bag-ong speed gun sa national office nga nagkantidad og P560,000 niadtong Lunes.
Sumala ni Dy dili na maka-alibi pa o makaikyas ang mga masinupakong drayber nga nilapas sa speed limit tungod kay ang maong speed gun maka-identipika sa tanang gadagang sakyanan kung kinsa gayod ang nag-overspeed.
Maka-kuha usab og video isip ebidensya sa hikusgon sa pagpadagan sa mga sakyanan.
Niini mu-imprinta usab kini og resibo sa mga plate numbers sa mga behikulo nga nilapas sa speed limit atol sa operasyon.
Matud ni Dy wala gayuy ikyas ang mga drayber kay usa ka kilometros ang gilay-on sa pweding ma-pusil nga sakyanan gamit ang maong high-tech nga speed gun ikumpara sa naandang ginagamit nga karaang speedgun nga kutob lang sa 100 metros.
Tungod kay apil sa features niini ang night vision magamit kini bisan sa gabie nga operasyon.
RadyoMaN Aimee Guinita
