Davao City- Nadakpan sa kapulisan sa San Pedro PNP ang usa ka high value target ala 1:05 sa kaadlawon atol sa gilusad nga buy bust operation sa pagpanguna ni San Pedro Station Commander PCI Ramil Macarampat, kauban ang City Drug Enforcement Unit (CDEU), lakip ang mga operatiba sa M2 nga gipangulohan ni Police Senior Supt. Jed Clamor ug naka koordinar sa PDEA11, sa gipatuman nga ‘double barrel reloaded’ natigayun didto sa Waling-waling St. Brgy. Daliao Toril ning dakbayan.
Base sa record sa kapulisan San Pedro, ang dinakpan naila nga si Ryan Niel Martinez alyas opaw, 40 anyos nga negosyante ug residente sa Juan Dela Cruz St. Toril ning dakbayan.
Narekober sa awtoridad gikan sa posisyon sa dinakpan nga gibutang sulod sa iyang black Mazda ang tulo ka medium-size rectangular shape transparent plastic ug lain pang usa ka large-size rectangular shape transparent plastic sachet nga gituohang shabu nga adunay estimated value nga 15,000.00 ka pesos, apil nakuha sa kapulisan ang buy bust money nga 1,000.00 ka pesos ug mga drug paraphernalia.
Ang dinakpan balhug na sa San Pedro PNP ug gihikay na sa kapulisan ang kasong kalapasan sa Republic Act 9165 kun Comprehensive Dangerous Drugs Act of 2002.
Sa pikas bahin, giposasan sab sa Buhangin PNP ang usa ka driver human namaligya og shabu kagahapong adlawa.
Napaslak sa selda sa Buhangin PNP si Reymund Elaso, 32 anyos, driver ug lumupyo sa Lupon, Davao Oriental human nadakpan sa buybust operation.
Gihimo ang operasyon sa Lubugan Toril base sa kagustuhan sa suspek alas 3:00 gahapon sa hapon.
Gitunol sa suspek ang sachet sa shabu sa pulis nga nagsilbing poseur buyer.
Nakumpiska gikan sa suspek ang laing tulo ka sachet sa shabu lakip na ang 1,000 ka pesos nga mark money.
Sumala ni Buhangin PNP Chief of Police Chief Inspector Jack Tilcag, kalapasan sa Republic Act 9165 kun Comprehensive Dangerous Drugs Act of 2002 ang ipasang-at nga kaso batok sa dinakpan.
RadyoMan Don Pulayao / RadyoMan Joel Viray
