VICTORIAS CITY – Patay ang isa ka suspek sa ginpatigayon nga buybust operation pasado las 6 kaina sang kaagahon sa Purok Par 5, Brgy. 20, Victorias City.
Ginkilala ang biktima kay Roy Sanchez, 30 anyos, single, residente sang amo nga lugar kag ginakabig sang police nga high value target.
Suno kay Victorias City Police Station chief, Col. Eduardo Corpuz, nga napilitan ang mga otoridad nga tiruhon ang suspek bangud nga iya namutikan nga pulis ang poseur buyer kag iya gintiklod kag nag-gabot sang iya armas.
Apang gin-deny naman ni Sonny Sanchez, magulang sang biktima nga nagbato ang iya manghud sa otoridad sang ini ang gindakup.
Suno kay Sanchez nga tupaday lang ang ila balay sang iya manghod gani sang ginsulod ini sang pulis iya gid nabati-an nga naga pakitluoy ang biktima kon diin iya pa ini ginhambalan nga kon may sala gid man ang iya manghud, mag upod na lang ini sa otoridad.
Apang sang ulihi nakabati ini sang mga lupok sang pusil kag wala na niya nabatian pa nga nagahambal ang iya manghud.
Base sa initial nga imbestigasyon, may tatlo ka igo sang bala sa iya dughan ang biktima nga gintunaan sang iya kamatayon.
Nakuha sa suspek ang kapin 17 ka sachet sang suspected shabu nga ginabulubanta may market value nga 600 ka libo ka pesos lakip na ang isa ka armas nga nagalupok kag mga bala.
[image: image.png]
