General Santos City—Nagbitay nang nakaplagan sa iyang 2 anyos nga anak ang usa ka ginang nga itago lang sa pangalang alias Angelica human kining naghikog sulod sa ilang panimalay sa may Purok, Malok, Barangay, Labangal, Gensan.
Subay sa pahayag sa bana sa biktima nga si Elvis, legal age, residenti sa maong lugar nga alas 4:00 ang takna sa hapon dihang nakit-an nalang sa ilang anak ang iyang asawa nga nagbitay na sulod sa ilang panimalay.
Buntag kagahapong adlawa dihang naglalis sila sa iyang asawa gumikan dili kini musugot nga siya molawod aron nga managat, apan iyang gipasabot sa iyang asawa nga kinahanglan niya mulawod aron nga aduna silay ipalit ug ilang pagkaon ug panginahanglan sulod sa panimalay.
Samtang naghipos matud pa siya sa iyang gamit aron mulawod, gipanglabay sa iyang asawa ang iyang mga senina, wala niya kini panumbalinga gumikan buot gyud niyang mulawod.
Natingala nalang siya dihang nag sige ug hilak ang iyang 2 anyos nga anak ug dihang iyang gisuta, iya nalang nakit-an nga nagbitay na nag iyang asawa. Ila dayon kining gidala sa ospital apan gideklara na kining dead on arrival.
