Ginpanginwala sang grupo sang Bangsamoro Islamic Freedom Fighters nga sila ang responsable sa pagtanom kag pagpasigabong sang IED sa syudad sang Koronadal City sang Dominggo sang udto, Abril 29, 2018.
Madumduman nga isa ka IED ang nagsigabong sa kilid sang Christ the King Cathedral nga ginkapilas sang duha ka mga persona kag isa pa ka eksplosibo ang nadetonate sa bahin sang 747 Convenience Store, Gensan Drive, Koronadal City.
Suno kay Abu Misry Mama, Spokesperson sang BIFF nga wala sang kamatuoran ang aligasyon sa ila sangkapolisan kundi ang responsable suno pa amo ang militar agud nga ang ila nga grupo ang mapasibangdan kag initan sang katawhan.
Nahibaluan nga ginpahayag ni PCSupt. Marcelo Morales, Regional Director PNP 12, nga posible BIFF ang utok sang pagpasigabong sang IED dire sa syudad sang Koronadal tungod diversionary tactics ini sang grupo kag nagatimalos sila matapos ang sunod-sunod nga operasyon sang kapolisan batok sa grupo nga nangin resulta sang pagkaaresto sang pipila ka mga miyembro sini.
