Roxas City, Capiz – Magapatigayon sang Diskwento Caravan Balik Eskwela edition ang Department of Trade and Industry (DTI) – Provincial Office sa Hunyo 6 sa banwa sang President Roxas kag Hunyo 7 sa banwa sang Mambusao.
Kaangut diri, ginaagda ni Ken Cuñada nga hepe sang DTI – Capiz ang mga pumoluyo sang nasambit nga mga banwa kag kaiping nga mga kabanwahanan nga hingalitan ang kahigayonan nga makabakal sang mga kagamitan sa pag-eskwela sa presyo nga may diskwento.
Kalakip sa mga igabaligya nga produkto sa mas ginpanubo nga presyo sa Diskwento Caravan amo ang nagkalainlain nga mga kagamitan sa pag-eskwela kapareho sang uniporme, sapatos, kag pagkaon magluwas pa sa mga galamiton sa sulod sang panimalay.
Ginpahayag ni Marjorie Tendras nga Public Information Officer sang DTI – Capiz nga ang Diskwento Caravan ang ipatigayon sang DTI sa suporta sang mga local manufacturer, retailer kag lokal nga panguluhan sang Pres. Roxas kag Mambusao agud nga madala palapit sa mga bumalakal ang nagapanguna nga kinahanglanon nga mga produkto kalakip sang mga kagamitan sa pag-eskwela.
Ang Diskwento Caravan nga inisyatibo sang DTI ang naghingyo sa mga negosyante nga maghatag sang diskwento, premium-in-packs, buy-one-take-one kag iban pa nga pamaagi sang pagbaligya para sa benepisyo sang mga bumalakal. (AAL/PIA6 Capiz)
