Cauayan City – Malamig na rehas ang hihimasin ng isang lalaki matapos nitong maaresto nang masamsaman ng hinihinalang shabu at marijuana sa Brgy. Compania, Tumauini, Isabela.
Kinilala ang naaresto na si alyas “Bong”, 53 anyos, residente ng nabanggit na lugar.
Sa nakuhang impormasyon ng IFM News Team sa Tumauini Police Station, sa pagsisilbi ng search warrant nasamsam sa kanyang pag-iingat ang 3 piraso ng silyadong plastic sachet na naglalaman ng hinihinalang shabu, at isang nakatuping bond paper na naglalaman ng hinihinalang pinatuyong dahon ng marijuana.
Maliban dito, nakumpiska ka rin ang dalawang piraso ng silyadong plastic sachet na walang laman, isang single motorcycle, wallet na naglalaman ng cash, at iba pang non-drug items.
Matapos ang pagmamarka at pag-iimbentaryo ng mga nakuhang ebidensya, dinala ang suspek sa ospital upang suriin, at di kalaunan ay dinala sa himpilan ng Tumauini Police Station para sa pagsasampa ng kasong paglabag sa RA 9165 o Comprehensive Dangerous Drugs Act of 2002.
