Hinungdan sa talagsaon nga hitsura sa gihimugso nga kabaw, gibutyag sa eksperto

Molave, Zamboanga del Sur – Congenital monsters twin fetus kini ang terminolohiya nga giluwatan sa mga eksperto labot sa sitwasyon sa gihimugso nga kabaw nga talagsaon ang hitsura kay may duha ka ulo, walo ka tiil, tulo ka dunggan ug duha ka kinatawo.
Sa interview sa DXPR kang Dr. Ernesto Duldulao, sa Provincial Veterinary Office sa Zamboanga del Sur nga ang depekto sa gianak nga nati nagsugod dihang gimabdos sa inahan ang kabaw diin mitunong kini-pagdevelop diha sulod tagu-angkan sa inahan rason nga nag-dikit kini.
Aminado usab si Dr. Duldulao nga dyutay ra ang purohan nga makalahutay ang hayop nga adunay susamang kahimtang kay dili man kini makabarog, maglisod pagkaon ug problemado usab inig patutoy apan kon alimahan pag-ayo sa tag-iya mamahimo nga makasugakod apan dako ang magasto niini.
Daku usab matud pa ang posibilidad nga usa lang ang ilang internal organ sa gimugso nga kabaw sama sa kasing-kasing, kidney ug uban pa.
Gitambagan usab niya ang tag-iya sa hayop nga moduol sa buhatan sa Municipal Veterinary Office aron mahatagan og libreng tambal nga ikadapat sa inahan nga kabaw ug bitamina aron mobalik ang kahimsog sa maong hayop.