Davao City – Hiyas sa Kadayawan, usa sa mga giatangan nga kompetisyon sa mga Dabawenyo ug mga turista matag selebrasyon sa Fruit Festival nga Kadayawan sa Dabaw.
Onse ka mga maanyag nga mga dalaga kinsa mirepresenta sa 11 ka tribu sa syudad nga mao sila si Chiary Balinan alang sa Tribung Ata, Karen Joy Dowing alang sa tribung Bagobo-K’lata, Lovern Jorich Bio sa Bagobo- Tagabawa, Monera Mande alang sa tribung Matigsalug, Hanna Agujitas alang sa tribung Obu Manuvu, Juhaira Omar alang sa tribung Iranun, Nes- Ann Naraga alang sa Kagan, Norjanah Sirad gikan sa tribung Maguinadanaon, Sittie Aisha Salim alang sa tribung Maranao, Tata Dolina Ambo gikan sa tribu nga Sama, ug Rahma Balijan Musa nga mirepresenta sa Tribung Tausug.
Usa sa mga tumong sa maong kompetisyon mao ang pag preserba ug pagpaila sa matag kultura ug tradisyon sa ilang mga kagikan.
Gikan sa unang adlaw nga pagpresenta sa dose ka mga hiyas, pagpasundayag sa ilang kultura pinaagi sa cultural presentation hangtod sa coronation day nagpakita og abilidad ang mga kandidata ilabi na sa ilang mga adbokasiya alang sa ikaayo sa ilang tribo.
Dakong kalipay ang nabati ni Nes-Ann Braem Naraga, 22 anyos gikan sa Tribong Kagan human kini napili isip Hiyas sa Kadayawan 2018.
Iyang adbokasiya mao ang cultural empowerment ug ang Islamic education alang sa mga tribu dinhi sa Davao City.
Sulti sa bag-ong hiyas sa kadayawan nga daku ang iyang pasalamat ngadto sa mga misuporta kaniya.
“Daghan kaayong salamat ilabina sa atong Mayor Inday Sara-Duterte, sa mga nisuporta ilabina sa akong pamilya, sa akong mga ka tribu, sa akong Deputy Mayor ug sa akong Madayaw Cultural Ensemble nga andam musuporta sa akoa,” segun ni Naraga.
Si Naraga gisul-ob ang bag-ong disenyo nga korona, sash ug nakadawat usab kini og cash prize nga P100,000 ug P50,000 nga pondo alang sa iyang proyekto.
Gawas niini, ang representante sa tribung Bagobo Klata nga si Karen Joy Dowing ang napili isip Hiyas ng Kalamboan ug napili usab nga Best in Cultural Presentation samtang ang Hiyas sa Maranao nga si Sittir Aisha Salim mao ang Hiyas sa Panaghiusa.
RadyoMaN Abi Bibera
