Davao City – Kusog ug lig-on nga pwersa ang masaksihan sa mga botante sa syudad sa Dabaw karon nga nagka-usa ang Hugpong sa Tawong Lungsod ug ang Hugpong ng Pagbabago.
Gikumpirmar kini ni Vice Mayor Bernard Al-Ag nga hingpit nag-usa ang HNP ug ang HTL alang sa kasiguroan sa kadaugan sa ilang mga kandidato sa eleksyon sunod tuig.
Segun ni Al-ag nga kasamtangan gihawiran ni Paolo Duterte ang chairmanship sa Hugpong sa Tawong Lungsod ug national chairman sab sa Hugpong ng Pagbabago si Mayor Inday Sara Duterte-Carpio.
Matud sa bise mayor nga kumpleto na ang linyada sa ilang mga kandidato gikan sa posisyon sa konsehal ug kongresista sa tulo sa distrito gawas sa bise mayor nga pilianan pa.
Karong adlaw’ng Martes sunod semana gikatakdang magpili ang partido kung kinsa nila Pulong Duterte, Baste Duterte, January Duterte ug Bernie Al-ag ang himoong tandem kang Mayor Inday Sara sa 2019 eleksyon.
Lauman nga adunay bag-ong mga nawong kansang magpapili sa pagkakonsehal gikan sa tulo ka distrito nunot sa pagtapos sa termino sa onse ka mga konsehal ning kasamtangan.
Samtang, mga magpapili sa pagka-kongresista ubos sa HNP ug HTL mao si Paolo Duterte sa unang distrito, Vincent Garcia sa ikaduhang distrito, ug Isidro Ungab sa ikatulong distrito.
Karong adlaw’ng Lunes, unang magduso sa tagsa-tagsa ka mga CoC ang tanang mag-papili sa pagka-konsehal ug katapusan magduso ang mga kandidato sa pagkamayor, bise mayor ug kongresista.
RadyoMaN Joel Viray
