Hon. Myra Shiela Nalupta-Barba nagsapatan kas RTC Judge iti Syudad ti Laoag

81

RMN Laoag – Pormalen a nagsapata ni Honorable Judge Myra Shiela Nalupta-Barba kas huwes iti Regional Trial Court (RTC) Branch 65 iti syudad ti Laoag.

Ni Judge Myra ti maysa kadagiti 19 a huwes iti Amianan a Luzon nga inapointaran ni Presidente Rodrigo Duterte idiay Malacañan. Angem inun-una iti daytoy nakapila ti naganna iti Supreme Court idi Marso 13, 2018.

Imun-una iti daytoy, nagserbi isuna a Municipal Trial Court Judge in Cities – Branch 01 iti met lang syudad ti Laoag. Ni Judge Myra ket anak daydi Abogado Mariano “Anno” Rosario Nalupta Jr. a maysa met a politiko.

Nagserbi ti amana kas Congressman iti Segundo Distrito iti Ilocos Norte manipud 1987 aginggana idi tawen 1992. Nagserbipay a Bise-Gobernador iti Ilocos Norte idi tawen 1992 aginggana idi tawen 2001.

Kas maysa nga anak ti abogado, kalikagom ni Judge Myra iti mangituloy iti narugian a serbisyo daydi amana babaen iti panangipaay iti umdas nga hustisya para ti sangkataohan.

“Ad majorem Dei gloriam! Dayaw ti Maipaay kenka O Dios! – Judge Myra Shiela Nalupta-Barba [Rtc Laoag]

Malagip a nangipasa ti Sangguniang Panlalawigan iti Ilocos Norte ti Resolution No. 248-2018 a mangkiddaw kenni Presidente Duterte a mangipan iti nayun a huwes kadagiti Regional Trial Court Laoag City iti Branch 16 ken 65 karaman iti branch 17 ken 18, iti syudad met ti Batac.

Iti sidong ti Article VIII, Section 9 iti 1987 Constitution, ti Presidente naaddaan iti bileg a mangapointar ti huwes nga agpaay kadagiti lower courts.

Dagiti dadduma a huwes a naapointaran ket agserbi iti Regional Trial Courts sadiay Baguio City, Benguet, Pangasinan, La Union ken Ilocos Sur.

Bernard Ver, RMN News

Facebook Comments