An 3 ka oras na hostage taking sa menor de edad kahapon sa udto miresulta sa pagkaluwas sa 10 anyos na bata samtang napatay isab an suspek human na tagbuno an isa ka miyembro sa PNP. Ini na insidente mitumaw sa may Bus Stop sa Purok 1, Brgy. Lipata, Surigao City kahapon Sa inisyal na impormasyon na samtang nohunong sa may Bus Stop an Bus nan Surigao Transport Corp. kalit na misaka an suspek ug nagdeklarar nan Hostage Taking, kalit na midayagan paggawas nan bus an iban na pasahero ug nabilin an 10 anyos na bata na taghimo na hostage. Sumaya pa na sa halos 3 ka oras na negosasyon, samtang tag-istorya nan negosyador an suspek misuway an mga pulis na duolon ini sa likod ug atubangan na bahin sa bus. Nakurat an suspek sa dihang paduol na sa ija an mga pulis ugsa na tagtukyod an bata ug tagbuno an isa ka Sgt. Ambrosio Andit na nasamdan sa may agtang ug abaga. Sunod niini an tagdumog nan mga pulis an suspek na miresulta sa pagpusil-patay. Nakilay-an an namatay na suspect na si Michael Belarma Puertogallera, 40 anyos, residente sa Valencia, Bukidnon. Padajon pa isab an layom na pag-imbestigar sa posible na rason kon uno na nahimo nan suspect an pagpan-hostage.
