Pabiling tanghaga karon sa Police Station 1 kung unsay motibo sa pagpusil sa riding in tandem sa manager sa Y Hotel nga nahimutang sa South Montilla Boulevard ning syudad sa Butuan, bandang alas 12:30 sa udto kagahapon.
Giila ang biktima nga si Norly Dizon, 49 anyos, taga Pampanga apan kasamtangang nanimuyu sa Golden Sun, Brgy. Villakanangga, ning dakbayan sa Butuan kinsa manager sa Y Hotel.
Gibutyag ni P/Capt. Emmerson Alipit, spokesman sa Butuan City Police Office (BCPO) nga luwas na ang kahimtang sa nasangpit nga biktima human kini daling gidala sa MJ Santos Hospital human kini gipusil sa riding in tandem diha sa Daisy Boy Village, 9th St. Guingona, Subdivision, Brgy. JP Rizal ning syudad samtang nang-snack ang biktima.
Gitutukan sa mga imbistigador sa kapulisan ang mga anggulo sama sa personal, may kalabot sa trabaho ug uban pa’ng mga posibleng anggulo sa maong krimen.
Mahinumduman nga gibutyag ni Tomas Busa ang Purok Chairman, nga naglingkod gawas sa tindahan ang biktima samtang nagsnack dihang kalit na lang nitunga ang duha ka mga armadong lalaki nga sakay sa single motor ug gipusil ang biktima dayon sibat ang mga suspek sa wala matinong direksyon.
Sa pagresponde sa gingsakpan sa Police Station 1 narekober sa crime scene ang duha ka slug sa bala ug duha ka basiyo sa gitoohang bala sa caliber 45.
Sa kasamtangan padayon pa ang imbestigasyon sa kapulisan sa maong krimen aron sayron ang motibo ug kung si kinsa ang mga suspek riding in tandem.
[image: norly.jpg]
