Davao City – Naalarma ang mga empleyado sa usa ka hotel nahimutang sa may F.Torres St. Barangay 9-A ning siyudad sa Davao human makadawat og bomb threat pinaagi sa usa ka text message.
Sa gihimong inbestigasyon sa kapolisan sa San Pedro, ang nakadawat sa maong mensahe mao si Lovelyn Legaspi, 29 anyos nagpuyo sa Tulip Drive, Matina ning siyudad.
Matud pa samtang nagduty ang moang babae nakadawat kini og mensahe bandang alas 2:53 sa kahaponon kinsa miingon nga dunay bomba sulod sa iyang gitrabahoan.
Sumala ni Jeane Pardo, manager sa nahisgutang establisemento nga wala silay idea kun unsay motibo sa pagbahad ug wala pay gikatudlo nga mga suspek.
Samtang nagpahigayon ug Clearing ug Paneling inspection ang mga personahe sa Davao City Police office -EOD Team sa Pagpanguna ni Sr.Police Officer 3 Roy Miranda ngadto sa tulo ka andana sa maong hotel apan walay nakaplagan nga IED kun bomba ug walay nakitang bagahi nga gibilin sa maong hotel.
Sa karon mas gipa-intensify sa kapolisan ang pagbantay sa ilang area of responsibility human duha ka bomba ang nibusikad didto sa Isulan Sultan Kudarat gahapong adlawa.
RadyoMaN Don Pulayao
